聯絡我們

本期活動

新年🧧意頭菜式
新年意頭菜式

新年🧧菜式多講究意頭,當中有好多好意頭食物都好有營養,適量進食都對健康有益處嘅😉!

 

  1. 髮菜 (1兩乾髮菜97千卡)

象徵住「發財💲」嘅髮菜其實係陸生藻類嚟,佢3成嘅熱量係由蛋白質而嚟,而且纖維都好高,每1兩乾嘅髮菜有成13克嘅纖維,佢亦提供到豐富嘅鐵質(32毫克)同鈣質(393毫克)添!

  1. 蠔豉 (10隻151千卡)

新春菜講起髮菜,緊係要講埋諧音「好巿」嘅蠔豉🦪啦!佢本身就係乾咗嘅蠔,有豐富嘅蛋白質,45%嘅熱量係蛋白質嚟,而且仲係脂肪較低嘅食物添。佢亦能提供鋅,除咗對於成長同細胞修復好重要外,佢亦有助支持免疫系統功能,有活化白血球嘅功效架!

  1. 撈起 (1人份250千卡)

新一年緊係希望人人有得撈、個個撈得起啦!撈起係由魚生同色彩繽紛嘅食材如青瓜絲🥒、紅蘿蔔🥕、甜椒🫑等所製成嘅,除咗顏色鮮豔吸睛外,仲有唔同嘅抗氧化營養素,而且脂肪唔高,1人份大概只有相等於約2茶匙油,醬汁另上或者走醬汁仲可以低啲添!

  1. 蒸魚 (1兩魚129千卡)

每逢新年必食嘅蒸魚🐟,象徵住年年有餘嘛!魚有豐富嘅蛋白質,脂肪唔高,55%嘅熱量係蛋白質嚟架!黃花魚、倉魚等魚類仲有豐富嘅奧米加3脂肪,可以減低患上各種心血管疾病嘅風險添。不過魚腩部位始終比魚背部位脂肪高啲,揀番魚背位就再健康啲啦!

  1. 蝦 (10隻細蝦146千卡)

同屬海鮮嘅蝦🦐亦係豐富嘅優質蛋白質來源,10隻細蝦都係得相等於約1茶匙嘅油咋!蝦亦富含硒質,有助身體保持正常嘅甲狀腺功能,蝦嘅蝦紅素係胡蘿蔔素嘅一種,有抗氧化嘅功效,對維持眼睛👀健康、免疫系統運作都有幫助架!象徵住「笑哈哈😆」嘅蝦,仲可以令我哋健康,就更「笑口常開」啦!

  1. 生菜 (1碗生菜14千卡)

「生財」嘅生菜🥗自然都係過年常見嘅菜類!雖然生菜嘅纖維喺蔬菜當中並唔高,每碗只有0.9克纖維,但勝在纖維唔高所以容易咀嚼同消化,消化功能較差嘅人士都可以食到,而且佢熱量好低,亦俾到我哋飽腹感。佢亦有豐富嘅β-胡蘿蔔素,1碗有成2540微克,對於預防夜盲症同維持皮膚同眼睛👀健康都有幫助。

  1. 蘋果 (1個中型蘋果122千卡)

新一年想出入平安,緊係要食蘋果🍎啦!所謂「一日一蘋果,醫生👨‍⚕️遠離我」,雖然蘋果嘅維他命C只係橙🍊嘅1/9,但係蘋果富含果膠,係一種水溶性纖維嚟,對我哋維持腸道入面益生菌嘅多元好重要,亦有穩定血糖嘅功效架!

  1. 桔 (2個細桔41千卡)

取其諧音「大吉大利」,各種柑桔🍊絕對係新年必備,2個柑桔只有41千卡嘅熱量,仲提供到22毫克嘅維他命C添!維他命C除咗同免疫力💪有關外,仲可以幫我哋身體吸收植物性嘅鐵質,對我哋製造膠原蛋白都好重要架!不過,凡事都要適可而止,千奇唔好手唔停係咁剝,食得太多都會影響血糖架!

  1. 蓮藕 (約8吋長1條74千卡)

相比起以上嘅意頭食物,象徵住「佳偶天成👩‍❤️‍👨」嘅蓮藕可能就無咁出名了!屬於根莖類嘅蓮藕嘅熱量雖然比好多深綠色葉菜都高,但唔代表佢唔健康嘅,同樣係100克,蓮藕嘅纖維其實係菜心嘅3.3倍嚟,有成5克咁多,而且佢都有豐富嘅維他命C,係成年人每日需要嘅49-59%,有抗氧化嘅功效,亦對身體製造骨膠原、維持免疫系統、血管🩸、結締組織等健康好重要。

  1. 海參 (1兩乾海參99千卡)

「心想事成」係最百搭嘅祝福,所以難怪新年大家都會豪爽啲食海參😁。海參都係優質蛋白質嚟,佢77%熱量係由蛋白質而嚟,而且脂肪仲好低添!佢富含礦物質例如鈣質、鎂質、鋅質同維他命B1、B2、B3等,有助加強代謝功能同提高免疫力💪

資料已成功發送,我們將於1-2個工作天內聯絡閣下
關閉